Aqtóbede demalys oryndaryn qalpyna keltirip, jańa demalys oryndaryn qurý belsendi túrde jalǵasýda. Búgingi kúni qalada 66 gúlzar men saıabaq bar. Olardyń 48-i sońǵy úsh jyldyń kóleminde ashyldy, dep habarlaıdy Aqtóbe oblysy ákiminiń baspasóz qyzmeti.
Barlyq jańa saıabaqtar men gúlzarlardy «Týǵan jerge taǵzym» aksııasynyń aıasynda memlekettik jáne qoǵamdyq uıymdardyń qyzmetkerleri, túrli kásiporyndar men jaı múddeli azamattar jabdyqtaǵanyn aıta ketý kerek. Jobalarǵa sáıkes sporttyq jáne oıyn alańdary ornatylyp, velojoldar tóselip, oryndyqtar qoıylǵan.
Mysaly, Densaýlyq saqtaý basqarmasynyń basshylyǵymen medısınalyq qaýymdastyq Batys-2 turǵyn úı kesheniniń turǵyndaryna «Densaýlyq saıabaǵyn» syılady. Onyń aýmaǵynda 1500-den astam aǵashtar men butalar otyrǵyzylyp, fýtbol alańdary, velosıped joly, ústel tennısi, vorkaýt alańy, sýburqaq ornatylǵan. Bolashaq shaǵyn aýdanynda jańa «Made in Aktobe» gúlzary ashyldy. Aqtóbelik turǵyndar úshin qarjygerler men ekonomıster gúlzarlary jańa demalys oryndaryna aınalyp, «100 teńge» túrindegi sımvolıkalyq arhıtektýralyq nysan qala kórkine kórik qosýda.
2 qyrkúıekte qala taǵy bir saıabaqpen tolyqty. Aqtóbeniń eski eski bóliginde munaıshylardyń kásibı merekesi kúni «SNPS-Aqtóbemunaıgaz» AQ-nyń óz qarajaty esebinen salynǵan «Dostyq» otbasylyq saıabaǵy ashyldy. 14 gektar aýmaq 220 mln. teńgege kóriktendirildi. Balalar oıyn alańdary, voleıbol, basketbol, shaǵyn fýtbol alańdary, ústel tennısi úshin ústelder, trenajerlar, kúrkeler ornatylǵan.
«Dostyq» saıabaǵyn kógaldandyrý jáne kóriktendirý jumystary jalǵasýda. Qyrkúıektiń ortasynan bastap munda 300 aǵash otyrǵyzý josparlanyp otyr.
Qosa keteıik, Aqtóbedegi 66 saıabaq pen gúlzarlardyń jalpy aýdany 1,3 mln. sharshy metrden asady. Osy jyldyń sońyna deıin taǵy 3 gúlzardy kóriktendirý aıaqtalatyn bolady.
Odan basqa, Aqtóbede bir shaqyrymnan asatyn jaıaý júrginshiler aımaǵy bar óz Arbaty paıda bolady. Onda shaǵyn dúkender, sýburqaq, sýretshiler alleıasy jáne qala turǵyndary men týrısterdiń demalýy úshin jaıly buryshtar ornalasady. Taǵy bir mańyzdy joba Tuńǵysh Prezıdent saıabaǵynyń keńeıýi. Onyń aıasynda 90-ga jerde Astana saıabaǵy, etno-aýyly, jaǵalaýdaǵy basty alleıa, ǵashyqtar alleıasy, orman jáne tarıhı aımaqtar, basqa da taqyryptyq demalys aımaǵy salynady. Qazirgi ýaqytta eki joba da iske asyrylýda.